ਅਲਬਰਟਾ ਵੱਲੋਂ ਕਮਿਊਨਿਟੀ ਸੰਸਥਾਵਾਂ ਲਈ 3.8 ਕਰੋੜ ਡਾਲਰ ਦੀ ਗ੍ਰਾਂਟ, ਕੈਲਗਰੀ ਦੀਆਂ ਸੰਸਥਾਵਾਂ ਨੂੰ ਵੀ ਫੰਡਿੰਗ

ਕੈਲਗਰੀ-ਅਲਬਰਟਾ ਸਰਕਾਰ ਨੇ ਸੂਬੇ ਭਰ ਦੀਆਂ ਕਮਿਊਨਿਟੀ ਸੰਸਥਾਵਾਂ ਦੀ ਮਦਦ ਲਈ 3.8 ਕਰੋੜ ਡਾਲਰ ਤੋਂ ਵੱਧ ਦੀ ਗ੍ਰਾਂਟ ਦਾ ਐਲਾਨ ਕੀਤਾ ਹੈ। ਇਸ ਤਹਿਤ ਕੈਲਗਰੀ ਮੀਲਜ਼ ਆਨ ਵ੍ਹੀਲਜ਼ ਅਤੇ ਜੈਨੇਸਿਸ ਸੈਂਟਰ ਨੂੰ ਵੀ ਫੰਡਿੰਗ ਮਿਲੀ ਹੈ।ਕੈਲਗਰੀ ਮੀਲਜ਼ ਆਨ ਵ੍ਹੀਲਜ਼ ਨੂੰ 6.5 ਲੱਖ ਡਾਲਰ ਦੀ ਗ੍ਰਾਂਟ ਦਿੱਤੀ ਗਈ ਹੈ। ਇਸ ਰਕਮ ਨਾਲ ਸੰਸਥਾ ਆਪਣੀ ਸਹੂਲਤ ਦਾ ਵਿਸਥਾਰ ਕਰਕੇ 1,300 ਵਰਗ ਫੁੱਟ ਦਾ ਫ੍ਰੀਜ਼ਰ ਅਤੇ 700 ਵਰਗ ਫੁੱਟ ਦਾ ਕੂਲਰ ਬਣਾਏਗੀ।

ਇਸ ਵਿਸਥਾਰ ਨਾਲ ਸੰਸਥਾ ਹਰ ਸਾਲ ਲਗਭਗ 1.8 ਲੱਖ ਵਾਧੂ ਖਾਣੇ ਤਿਆਰ ਕਰਕੇ ਵੰਡ ਸਕੇਗੀ। ਇਸ ਦਾ ਲਾਭ ਬਜ਼ੁਰਗਾਂ, ਆਰਥਿਕ ਮੁਸ਼ਕਲਾਂ ਦਾ ਸਾਹਮਣਾ ਕਰ ਰਹੇ ਪਰਿਵਾਰਾਂ, ਬਿਮਾਰੀ ਤੋਂ ਠੀਕ ਹੋ ਰਹੇ ਲੋਕਾਂ ਅਤੇ ਸਕੂਲੀ ਭੋਜਨ ਪ੍ਰੋਗਰਾਮਾਂ ’ਤੇ ਨਿਰਭਰ ਵਿਦਿਆਰਥੀਆਂ ਨੂੰ ਮਿਲੇਗਾ।ਕੈਲਗਰੀ ਮੀਲਜ਼ ਆਨ ਵ੍ਹੀਲਜ਼ ਇਸ ਸਮੇਂ ਆਪਣੇ ਵੱਖ-ਵੱਖ ਪ੍ਰੋਗਰਾਮਾਂ ਰਾਹੀਂ 9,000 ਤੋਂ ਵੱਧ ਲੋਕਾਂ ਨੂੰ ਸੇਵਾਵਾਂ ਦੇ ਰਹੀ ਹੈ।

ਉੱਧਰ, ਨੌਰਥਈਸਟ ਕੈਲਗਰੀ ਸਥਿਤ ਜੈਨੇਸਿਸ ਸੈਂਟਰ ਨੂੰ 1.25 ਲੱਖ ਡਾਲਰ ਦੀ ਗ੍ਰਾਂਟ ਮਿਲੀ ਹੈ। ਇਸ ਰਕਮ ਨਾਲ ਸੈਂਟਰ ਦੀ ਪੁਰਾਣੀ ਲਿਫ਼ਟ ਨੂੰ ਬਦਲਿਆ ਜਾਵੇਗਾ, ਜਿਸ ਨਾਲ ਸੁਰੱਖਿਆ ਅਤੇ ਪਹੁੰਚਯੋਗਤਾ ਵਿੱਚ ਸੁਧਾਰ ਹੋਵੇਗਾ।ਜੈਨੇਸਿਸ ਸੈਂਟਰ ਹਰ ਸਾਲ ਲਗਭਗ 25 ਲੱਖ ਲੋਕਾਂ ਦੀ ਮੇਜ਼ਬਾਨੀ ਕਰਦਾ ਹੈ। ਇੱਥੇ ਟੀਕਾਕਰਨ ਕਲੀਨਿਕ, ਭਾਸ਼ਾ ਕਲਾਸਾਂ, ਸੱਭਿਆਚਾਰਕ ਤੇ ਧਾਰਮਿਕ ਸਮਾਗਮਾਂ ਸਮੇਤ ਕਈ ਕਮਿਊਨਿਟੀ ਸੇਵਾਵਾਂ ਚਲਦੀਆਂ ਹਨ।ਅਲਬਰਟਾ ਦੀ ਕਲਾ, ਸੱਭਿਆਚਾਰ ਅਤੇ ਮਹਿਲਾ ਸਥਿਤੀ ਮੰਤਰੀ ਤਾਨਿਆ ਫ਼ਿਰ ਨੇ ਕਿਹਾ ਕਿ ਗ੍ਰਾਂਟਾਂ ਦਾ ਮਕਸਦ ਗੈਰ-ਮੁਨਾਫ਼ਾ ਸੰਸਥਾਵਾਂ ਨੂੰ ਕਮਿਊਨਿਟੀ ਦੀਆਂ ਵਧਦੀਆਂ ਲੋੜਾਂ ਪੂਰੀਆਂ ਕਰਨ ਦੇ ਯੋਗ ਬਣਾਉਣਾ ਹੈ।

ਸਰਕਾਰ ਮੁਤਾਬਕ Community Facility Enhancement Program ਅਤੇ Community Initiatives Program ਤਹਿਤ ਹਰ ਸਾਲ ਸੂਬੇ ਭਰ ਵਿੱਚ 700 ਤੋਂ ਵੱਧ ਪ੍ਰੋਜੈਕਟਾਂ ਨੂੰ ਸਹਾਇਤਾ ਦਿੱਤੀ ਜਾਂਦੀ ਹੈ।ਅਲਬਰਟਾ ਸਰਕਾਰ ਨੇ ਕਿਹਾ ਕਿ ਕਮਿਊਨਿਟੀ ਸੰਸਥਾਵਾਂ ਲਈ ਇਹ ਫੰਡਿੰਗ ਸੇਵਾਵਾਂ ਦੇ ਵਿਸਥਾਰ ਅਤੇ ਲੋਕਾਂ ਦੀਆਂ ਵਧਦੀਆਂ ਲੋੜਾਂ ਨੂੰ ਪੂਰਾ ਕਰਨ ਵਿੱਚ ਅਹਿਮ ਭੂਮਿਕਾ ਨਿਭਾਏਗੀ।