ਕੈਨੇਡਾ ‘ਚ 8,000 ਤੋਂ ਵੱਧ ਵੋਕਸਵੈਗਨ ਗੱਡੀਆਂ ਵਾਪਿਸ ਮੰਗਵਾਈਆਂ
ਓਟਵਾ: ਟਰਾਂਸਪੋਰਟ ਕੈਨੇਡਾ ਵੱਲੋਂ 8,000 ਤੋਂ ਵੱਧ ਵੋਕਸਵੈਗਨ ਦੀਆਂ ਗੱਡੀਆਂ ਨੂੰ ਸੁਰੱਖਿਆ ਖਤਰੇ ਦੇ ਮੱਦੇਨਜ਼ਰ ਵਾਪਿਸ ਮੰਗਵਾਇਆ ਗਿਆ ਹੈ। ਅਧਿਕਾਰੀਆਂ ਮੁਤਾਬਕ ਇਹ ਰਿਕਾਲ ਸਾਫਟਵੇਅਰ ਵਿੱਚ ਖਾਮੀ ਕਾਰਨ ਕੀਤਾ ਗਿਆ ਹੈ। ਜਾਣਕਾਰੀ ਅਨੁਸਾਰ, ਗੱਡੀ ਸਟਾਰਟ ਕਰਨ ਸਮੇਂ ਇੰਸਟਰੂਮੈਂਟ ਕਲੱਸਟਰ ਸਹੀ ਤਰੀਕੇ ਨਾਲ ਕੰਮ ਨਹੀਂ ਕਰ ਸਕਦਾ। ਇਸ ਕਾਰਨ ਡਰਾਈਵਰ ਨੂੰ ਸਪੀਡੋਮੀਟਰ, ਗੇਅਰ ਸੂਚਕ ਅਤੇ ਵਾਰਨਿੰਗ ਲਾਈਟਾਂ ਵਰਗੀ ਅਹਿਮ ਜਾਣਕਾਰੀ ਨਹੀਂ ਮਿਲਦੀ, ਜੋ ਸੜਕ ਸੁਰੱਖਿਆ ਲਈ ਗੰਭੀਰ ਖਤਰਾ ਬਣ ਸਕਦੀ ਹੈ।ਇਸ ਖਾਮੀ ਨਾਲ ਹਾਦਸਿਆਂ ਦੀ ਸੰਭਾਵਨਾ ਵੱਧ ਸਕਦੀ ਹੈ, ਖ਼ਾਸ ਕਰਕੇ ਉਹਨਾਂ ਹਾਲਾਤਾਂ ਵਿੱਚ ਜਿੱਥੇ ਡਰਾਈਵਰ ਨੂੰ ਤੁਰੰਤ ਗਤੀ ਜਾਂ ਵਾਹਨ ਦੀ ਸਥਿਤੀ ਬਾਰੇ ਜਾਣਕਾਰੀ ਦੀ ਲੋੜ ਹੁੰਦੀ ਹੈ।
ਪ੍ਰਭਾਵਿਤ ਮਾਡਲਾਂ ਵਿੱਚ ਵੋਕਸਵੈਗਨ ਜੈਟਾ 2025 ਅਤੇ ਵੋਕਸਵੈਗਨ ਤਾਓਸ 2025 ਸ਼ਾਮਲ ਹਨ। ਅਧਿਕਾਰੀਆਂ ਨੇ ਮਾਲਕਾਂ ਨੂੰ ਸਲਾਹ ਦਿੱਤੀ ਹੈ ਕਿ ਉਹ ਆਪਣੇ ਵਾਹਨ ਦੀ ਜਾਂਚ ਕਰਵਾਉਣ ਲਈ ਨਜ਼ਦੀਕੀ ਡੀਲਰ ਨਾਲ ਸੰਪਰਕ ਕਰਨ।ਵੋਕਸਵੈਗਨ ਵੱਲੋਂ ਕਿਹਾ ਗਿਆ ਹੈ ਕਿ ਪ੍ਰਭਾਵਿਤ ਵਾਹਨਾਂ ਵਿੱਚ ਇਹ ਸਮੱਸਿਆ ਮੁਫ਼ਤ ਸਾਫਟਵੇਅਰ ਅੱਪਡੇਟ ਰਾਹੀਂ ਠੀਕ ਕੀਤੀ ਜਾਵੇਗੀ। ਨਾਲ ਹੀ, ਗਾਹਕਾਂ ਨੂੰ ਜਲਦੀ ਸੂਚਿਤ ਕੀਤਾ ਜਾਵੇਗਾ ਤਾਂ ਜੋ ਉਹ ਆਪਣੀਆਂ ਗੱਡੀਆਂ ਦੀ ਮੁਰੰਮਤ ਕਰਵਾ ਸਕਣ।ਅਧਿਕਾਰੀਆਂ ਨੇ ਇਹ ਵੀ ਕਿਹਾ ਹੈ ਕਿ ਜੇਕਰ ਡਰਾਈਵਰ ਨੂੰ ਇੰਸਟਰੂਮੈਂਟ ਕਲੱਸਟਰ ਨਾਲ ਸੰਬੰਧਿਤ ਕੋਈ ਸਮੱਸਿਆ ਮਹਿਸੂਸ ਹੁੰਦੀ ਹੈ, ਤਾਂ ਉਹ ਤੁਰੰਤ ਵਾਹਨ ਦੀ ਵਰਤੋਂ ਘੱਟ ਕਰਕੇ ਮਾਹਿਰ ਦੀ ਸਲਾਹ ਲੈਣ।
