ਮੁਕਾਬਲੇ ਦੀ ਥਾਂ ਰਿਸ਼ਤੇ, ਸਿਆਸਤ ਦੀ ਥਾਂ ਲੋਕ: ਬ੍ਰਿਕਸ ਰਾਹੀਂ ਦੁਨੀਆ ਨਾਲ ਸਬੰਧ ਮਜ਼ਬੂਤ ਕਰੇਗਾ ਭਾਰਤ
India is seeking to use the BRICS summit to strengthen relationships, promote cooperation and put people and development at the centre of its global diplomacy. New Delhi aims to maintain strategic autonomy while working with different international groupings and strengthening the voice of the Global South.
ਨਵੀਂ ਦਿੱਲੀ-ਭਾਰਤ ਇਸ ਹਫ਼ਤੇ ਹੋਣ ਵਾਲੇ 18ਵੇਂ ਬ੍ਰਿਕਸ ਸੰਮੇਲਨ ਦੀ ਮੇਜ਼ਬਾਨੀ ਦੌਰਾਨ ਬਦਲਦੇ ਅਤੇ ਅਣਸ਼ਚਿਤ ਵਿਸ਼ਵ ਮਾਹੌਲ ਵਿੱਚ ਵੱਖ-ਵੱਖ ਦੇਸ਼ਾਂ ਨਾਲ ਸਬੰਧ ਮਜ਼ਬੂਤ ਕਰਨ ਅਤੇ ਸਹਿਯੋਗ ਦੇ ਨਵੇਂ ਰਾਹ ਖੋਲ੍ਹਣ ’ਤੇ ਧਿਆਨ ਕੇਂਦਰਿਤ ਕਰੇਗਾ। ਭਾਰਤ ਦੀ ਪਹੁੰਚ ਵਿਕਾਸ, ਬਹੁਪੱਖੀ ਸਹਿਯੋਗ ਅਤੇ ਲੋਕ-ਕੇਂਦਰਿਤ ਨੀਤੀਆਂ ’ਤੇ ਆਧਾਰਿਤ ਰਹੇਗੀ।
ਭਾਰਤੀ ਅਧਿਕਾਰੀਆਂ ਮੁਤਾਬਕ ਨਵੀਂ ਦਿੱਲੀ ਦੀ ਕੂਟਨੀਤੀ ਵਿੱਚ ਮੁਕਾਬਲੇ ਦੀ ਥਾਂ ਰਿਸ਼ਤਿਆਂ, ਸਿਰਫ਼ ਬਿਆਨਾਂ ਦੀ ਥਾਂ ਠੋਸ ਕਾਰਵਾਈ ਅਤੇ ਸਿਆਸਤ ਦੀ ਥਾਂ ਲੋਕਾਂ ਨੂੰ ਤਰਜੀਹ ਦਿੱਤੀ ਜਾ ਰਹੀ ਹੈ। ਇਸ ਨੂੰ ਬਦਲਦੇ ਵਿਸ਼ਵ ਸਮੀਕਰਨਾਂ ਦਰਮਿਆਨ ਭਾਰਤ ਦੀ ਸੰਤੁਲਿਤ ਕੂਟਨੀਤਕ ਰਣਨੀਤੀ ਵਜੋਂ ਦੇਖਿਆ ਜਾ ਰਿਹਾ ਹੈ।
ਸੰਮੇਲਨ ਵਿੱਚ ਸੰਯੁਕਤ ਅਰਬ ਅਮੀਰਾਤ ਅਤੇ ਇਰਾਨ ਸਮੇਤ ਅਜਿਹੇ ਦੇਸ਼ ਵੀ ਇਕੱਠੇ ਹੋਣਗੇ, ਜੋ ਪੱਛਮੀ ਏਸ਼ੀਆ ਦੇ ਟਕਰਾਅ ਕਾਰਨ ਵੱਖ-ਵੱਖ ਧਿਰਾਂ ’ਤੇ ਖੜ੍ਹੇ ਹਨ। ਅਜਿਹੇ ਹਾਲਾਤ ਵਿੱਚ ਭਾਰਤ ਗੱਲਬਾਤ, ਸਹਿਯੋਗ ਅਤੇ ਸਾਂਝੇ ਹਿੱਤਾਂ ਰਾਹੀਂ ਬ੍ਰਿਕਸ ਮੰਚ ਨੂੰ ਹੋਰ ਮਜ਼ਬੂਤ ਕਰਨ ਦੀ ਕੋਸ਼ਿਸ਼ ਕਰੇਗਾ।
ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਕਿਹਾ ਹੈ ਕਿ ਬ੍ਰਿਕਸ ਸੰਮੇਲਨ ਵਿੱਚ ਵਿਸ਼ਵ ਆਗੂ ਵੱਖ-ਵੱਖ ਮੁੱਦਿਆਂ ’ਤੇ ਸਕਾਰਾਤਮਕ ਅਤੇ ਸਾਰਥਕ ਵਿਚਾਰ-ਵਟਾਂਦਰਾ ਕਰਨਗੇ। ਉਨ੍ਹਾਂ ਵਿਸ਼ਵ ਭਲਾਈ ਲਈ ਸਾਂਝੇ ਯਤਨਾਂ ਦੀ ਲੋੜ ’ਤੇ ਵੀ ਜ਼ੋਰ ਦਿੱਤਾ।
ਭਾਰਤ ਬ੍ਰਿਕਸ ਨੂੰ ਬਹੁਧੁਰੀ ਵਿਸ਼ਵ ਵਿਵਸਥਾ ਨੂੰ ਮਜ਼ਬੂਤ ਕਰਨ ਵਾਲੇ ਅਹਿਮ ਮੰਚ ਵਜੋਂ ਦੇਖਦਾ ਹੈ। ਇਸ ਦੇ ਨਾਲ ਹੀ ਨਵੀਂ ਦਿੱਲੀ ਜੀ-20, ਸ਼ੰਘਾਈ ਸਹਿਯੋਗ ਸੰਗਠਨ ਅਤੇ ਕਵਾਡ ਵਰਗੇ ਹੋਰ ਕੌਮਾਂਤਰੀ ਮੰਚਾਂ ਵਿੱਚ ਵੀ ਸਰਗਰਮ ਹੈ। ਇਸ ਰਾਹੀਂ ਭਾਰਤ ਵੱਖ-ਵੱਖ ਦੇਸ਼ਾਂ ਨਾਲ ਸਬੰਧ ਕਾਇਮ ਰੱਖਦਿਆਂ ਆਪਣੀ ਰਣਨੀਤਕ ਖੁਦਮੁਖਤਿਆਰੀ ਨੂੰ ਬਰਕਰਾਰ ਰੱਖਣ ਦੀ ਕੋਸ਼ਿਸ਼ ਕਰ ਰਿਹਾ ਹੈ।
ਬ੍ਰਿਕਸ ਵਿੱਚ ਭਾਰਤ ਮਨੁੱਖਤਾ ਨੂੰ ਪਹਿਲ, ਵਿਕਾਸ ਅਤੇ ਗਲੋਬਲ ਸਾਊਥ ਦੇ ਦੇਸ਼ਾਂ ਦੀ ਆਵਾਜ਼ ਨੂੰ ਮਜ਼ਬੂਤ ਕਰਨ ਵਰਗੇ ਮੁੱਦਿਆਂ ਨੂੰ ਤਰਜੀਹ ਦੇਣ ’ਤੇ ਜ਼ੋਰ ਦੇਵੇਗਾ। ਵਿਸ਼ਵ ਸ਼ਾਸਨ ਪ੍ਰਣਾਲੀ ਵਿੱਚ ਸੁਧਾਰ ਲਈ ਸਾਂਝੀ ਵਚਨਬੱਧਤਾ ਵੀ ਭਾਰਤ ਦੇ ਏਜੰਡੇ ਦਾ ਅਹਿਮ ਹਿੱਸਾ ਰਹੇਗੀ।
