ਕੈਲਗਰੀ ਵਾਸੀਆਂ ਦੇ ਗੈਸ ਬਿੱਲਾਂ ’ਚ ਹੋਵੇਗਾ ਵਾਧਾ, ਫਰੈਂਚਾਈਜ਼ ਫੀਸ ਵਧਾਉਣ ਦੀ ਅਰਜ਼ੀ ਦਾਇਰ

ਕੈਲਗਰੀ: ਕੈਲਗਰੀ ਵਾਸੀਆਂ ਨੂੰ 2027 ਤੋਂ ਕੁਦਰਤੀ ਗੈਸ ਦੇ ਬਿੱਲਾਂ ’ਤੇ ਹਰ ਮਹੀਨੇ ਵਾਧੂ ਰਕਮ ਅਦਾ ਕਰਨੀ ਪੈ ਸਕਦੀ ਹੈ। ਸਿਟੀ ਆਫ਼ ਕੈਲਗਰੀ ਅਤੇ ਏਟੀਸੀਓ ਗੈਸ ਐਂਡ ਪਾਈਪਲਾਈਨਜ਼ ਵਿਚਾਲੇ ਫਰੈਂਚਾਈਜ਼ ਫੀਸ ਸਮਝੌਤੇ ਵਿੱਚ ਸੋਧ ਲਈ ਅਲਬਰਟਾ ਯੂਟਿਲਿਟੀਜ਼ ਕਮਿਸ਼ਨ (AUC) ਕੋਲ ਅਰਜ਼ੀ ਦਾਇਰ ਕੀਤੀ ਗਈ ਹੈ।ਪ੍ਰਸਤਾਵਿਤ ਸੋਧ ਤਹਿਤ 1 ਜਨਵਰੀ 2027 ਤੋਂ ਔਸਤ ਗੈਸ ਖਪਤਕਾਰ ਲਈ ਨਿਰਧਾਰਤ ਗੈਸ ਕੀਮਤ 3.15 ਡਾਲਰ ਤੋਂ ਵਧਾ ਕੇ 5.67 ਡਾਲਰ ਪ੍ਰਤੀ ਗੀਗਾਜੂਲ ਕਰਨ ਦੀ ਤਜਵੀਜ਼ ਹੈ। ਇਸ ਦੇ ਨਤੀਜੇ ਵਜੋਂ ਔਸਤ ਗਾਹਕ ਦੇ ਗੈਸ ਬਿੱਲ ਵਿੱਚ ਲਗਭਗ 2.45 ਡਾਲਰ ਪ੍ਰਤੀ ਮਹੀਨਾ ਵਾਧਾ ਹੋ ਸਕਦਾ ਹੈ।ਕੈਲਗਰੀ ਸਿਟੀ ਕੌਂਸਲ ਨੇ ਮਈ ਵਿੱਚ 2027 ਦੌਰਾਨ ਕੁਦਰਤੀ ਗੈਸ ਫਰੈਂਚਾਈਜ਼ ਫੀਸ ਤੋਂ 98.2 ਮਿਲੀਅਨ ਡਾਲਰ ਇਕੱਠੇ ਕਰਨ ਦੀ ਯੋਜਨਾ ਨੂੰ ਮਨਜ਼ੂਰੀ ਦਿੱਤੀ ਸੀ। 2026 ਵਿੱਚ ਇਸ ਸਰੋਤ ਤੋਂ 71.6 ਮਿਲੀਅਨ ਡਾਲਰ ਦੀ ਆਮਦਨ ਹੋਣ ਦਾ ਅਨੁਮਾਨ ਹੈ।

ਸਿਟੀ ਮੁਤਾਬਕ ਫਰੈਂਚਾਈਜ਼ ਫੀਸ ਯੂਟਿਲਿਟੀ ਬਿੱਲਾਂ ਰਾਹੀਂ ਇਕੱਠੀ ਕੀਤੀ ਜਾਂਦੀ ਹੈ ਅਤੇ ਇਹ ਸਿਟੀ ਦੇ ਰੋਜ਼ਾਨਾ ਖਰਚਿਆਂ ਅਤੇ ਲੋਕਾਂ ਨੂੰ ਮੁਹੱਈਆ ਕਰਵਾਈਆਂ ਜਾਣ ਵਾਲੀਆਂ ਸੇਵਾਵਾਂ ਲਈ ਆਮਦਨ ਦਾ ਇੱਕ ਮਹੱਤਵਪੂਰਨ ਸਰੋਤ ਹੈ।ਕੈਲਗਰੀ ਦੇ ਮੇਅਰ ਜੈਰੋਮੀ ਫਾਰਕਸ ਨੇ ਫੀਸ ਵਿੱਚ ਵਾਧੇ ਦਾ ਸਮਰਥਨ ਕਰਦਿਆਂ ਕਿਹਾ ਕਿ ਵਧੀ ਹੋਈ ਆਮਦਨ ਨੂੰ ਜ਼ਰੂਰੀ ਬੁਨਿਆਦੀ ਢਾਂਚੇ ’ਤੇ ਖਰਚ ਕੀਤਾ ਜਾਣਾ ਚਾਹੀਦਾ ਹੈ। ਉਨ੍ਹਾਂ ਕਿਹਾ ਕਿ ਸ਼ਹਿਰ ਸਾਹਮਣੇ ਅਗਲੇ 10 ਸਾਲਾਂ ਦੌਰਾਨ ਕਰੀਬ 50 ਅਰਬ ਡਾਲਰ ਦੇ ਬੁਨਿਆਦੀ ਢਾਂਚੇ ਦੇ ਘਾਟੇ ਦੀ ਚੁਣੌਤੀ ਹੈ।

ਮੇਅਰ ਨੇ ਕਿਹਾ ਕਿ ਪਾਣੀ ਦੀਆਂ ਮੁੱਖ ਲਾਈਨਾਂ, ਸੜਕਾਂ, ਪੁਲਾਂ ਅਤੇ ਮਨੋਰੰਜਨ ਕੇਂਦਰਾਂ ਸਮੇਤ ਜ਼ਰੂਰੀ ਢਾਂਚੇ ਦੀ ਮੁਰੰਮਤ ਲਈ ਵੱਡੇ ਨਿਵੇਸ਼ ਦੀ ਲੋੜ ਹੈ।ਉਨ੍ਹਾਂ ਜ਼ੋਰ ਦਿੱਤਾ ਕਿ ਫਰੈਂਚਾਈਜ਼ ਫੀਸ ਤੋਂ ਇਕੱਠਾ ਹੋਣ ਵਾਲਾ ਹਰ ਵਾਧੂ ਡਾਲਰ ਜ਼ਰੂਰੀ ਬੁਨਿਆਦੀ ਢਾਂਚੇ ਲਈ ਨਿਰਧਾਰਤ ਕੀਤਾ ਜਾਣਾ ਚਾਹੀਦਾ ਹੈ ਅਤੇ ਇਸ ਰਕਮ ਦੀ ਵਰਤੋਂ ਸਿਰਫ਼ ਭਵਿੱਖ ਵਿੱਚ ਜਾਇਦਾਦ ਟੈਕਸ ਵਧਣ ਤੋਂ ਬਚਾਉਣ ਲਈ ਨਹੀਂ ਹੋਣੀ ਚਾਹੀਦੀ।ਪ੍ਰਸਤਾਵਿਤ ਵਾਧੇ ਸਬੰਧੀ ਕੈਲਗਰੀ ਵਾਸੀਆਂ ਤੋਂ 7 ਤੋਂ 25 ਅਗਸਤ 2026 ਤੱਕ ਜਨਤਕ ਰਾਇ ਮੰਗੀ ਗਈ ਹੈ। ਪ੍ਰਾਪਤ ਸੁਝਾਅ ਅਤੇ ਇਤਰਾਜ਼ ਏਟੀਸੀਓ ਵੱਲੋਂ AUC ਨੂੰ ਦਿੱਤੀ ਜਾਣ ਵਾਲੀ ਅਰਜ਼ੀ ਵਿੱਚ ਸ਼ਾਮਲ ਕੀਤੇ ਜਾਣਗੇ।ਏਟੀਸੀਓ ਗੈਸ ਵੱਲੋਂ ਸਿਟੀ ਆਫ਼ ਕੈਲਗਰੀ ਦੀ ਤਰਫ਼ੋਂ ਦਰਾਂ ਵਿੱਚ ਵਾਧੇ ਦੀ ਮਨਜ਼ੂਰੀ ਲਈ 21 ਸਤੰਬਰ 2026 ਤੱਕ ਅਰਜ਼ੀ ਦੇਣੀ ਹੈ।