ਕੈਲਗਰੀ ’ਚ ਸੀ-ਟਰੇਨ ਦੀ ਲਪੇਟ ’ਚ ਆਇਆ ਪੈਦਲ ਯਾਤਰੀ

ਕੈਲਗਰੀ-ਕੈਲਗਰੀ ਦੇ ਡਾਊਨਟਾਊਨ ਇਲਾਕੇ ਵਿੱਚ ਵੀਰਵਾਰ ਸਵੇਰੇ ਇੱਕ ਪੈਦਲ ਯਾਤਰੀ ਸੀ-ਟਰੇਨ ਦੀ ਲਪੇਟ ਵਿੱਚ ਆ ਗਿਆ। ਇਹ ਘਟਨਾ ਸਵੇਰੇ ਕਰੀਬ 6:30 ਵਜੇ 7ਵੀਂ ਸਟਰੀਟ ਅਤੇ 7ਵੀਂ ਐਵੇਨਿਊ ਐੱਸ.ਡਬਲਿਊ. ਨੇੜੇ ਵਾਪਰੀ।ਘਟਨਾ ਦੀ ਸੂਚਨਾ ਮਿਲਣ ’ਤੇ ਐਮਰਜੈਂਸੀ ਸੇਵਾਵਾਂ ਮੌਕੇ ’ਤੇ ਪਹੁੰਚੀਆਂ। ਐਮਰਜੈਂਸੀ ਮੈਡੀਕਲ ਸਰਵਿਸਿਜ਼ (ਈ.ਐੱਮ.ਐੱਸ.) ਮੁਤਾਬਕ ਇੱਕ ਬਾਲਗ ਵਿਅਕਤੀ ਨੂੰ ਗੈਰ-ਜਾਨਲੇਵਾ ਹਾਲਤ ਵਿੱਚ ਹਸਪਤਾਲ ਪਹੁੰਚਾਇਆ ਗਿਆ।

ਘਟਨਾ ਕਾਰਨ ਕੈਲਗਰੀ ਟਰਾਂਜ਼ਿਟ ਦੀਆਂ ਰੈੱਡ ਅਤੇ ਬਲੂ ਲਾਈਨਾਂ ’ਤੇ ਆਵਾਜਾਈ ਕਈ ਘੰਟਿਆਂ ਲਈ ਪ੍ਰਭਾਵਿਤ ਰਹੀ। ਕੇਰਬੀ/ਸੰਨੀਸਾਈਡ ਅਤੇ ਸਿਟੀ ਹਾਲ ਸਟੇਸ਼ਨਾਂ ਵਿਚਕਾਰ ਸੀ-ਟਰੇਨਾਂ ਦੀ ਆਵਾਜਾਈ ਬੰਦ ਕਰ ਦਿੱਤੀ ਗਈ ਸੀ।ਯਾਤਰੀਆਂ ਦੀ ਸਹੂਲਤ ਲਈ ਪ੍ਰਭਾਵਿਤ ਰੂਟ ’ਤੇ ਸ਼ਟਲ ਬੱਸਾਂ ਚਲਾਈਆਂ ਗਈਆਂ। ਸਥਿਤੀ ’ਤੇ ਕਾਬੂ ਪਾਉਣ ਤੋਂ ਬਾਅਦ ਸਵੇਰੇ ਕਰੀਬ 8 ਵਜੇ ਰੈੱਡ ਅਤੇ ਬਲੂ ਦੋਵੇਂ ਲਾਈਨਾਂ ’ਤੇ ਸੀ-ਟਰੇਨ ਸੇਵਾ ਮੁੜ ਸ਼ੁਰੂ ਕਰ ਦਿੱਤੀ ਗਈ। ਕੈਲਗਰੀ ਪੁਲਿਸ ਵੱਲੋਂ ਘਟਨਾ ਦੀ ਜਾਂਚ ਕੀਤੀ ਜਾ ਰਹੀ ਹੈ।