ਟੈਰਿਫ਼ਾਂ ‘ਚ ਛੂਟ ਤੋਂ ਬਿਨਾਂ ਸ਼ਰਾਬ ਪਾਬੰਦੀ ਨਹੀਂ ਹਟੇਗੀ : ਪ੍ਰਧਾਨ ਮੰਤਰੀ ਕਾਰਨੀ
ਓਟਵਾ-ਕੈਨੇਡਾ ਦੇ ਪ੍ਰਧਾਨ ਮੰਤਰੀ Mark Carney ਨੇ ਅਮਰੀਕਾ ਨਾਲ ਚੱਲ ਰਹੇ ਵਪਾਰਕ ਤਣਾਅ ‘ਤੇ ਸਖ਼ਤ ਰੁਖ ਅਪਣਾਉਂਦਿਆਂ ਕਿਹਾ ਹੈ ਕਿ ਅਮਰੀਕੀ ਸ਼ਰਾਬ ‘ਤੇ ਲੱਗੀ ਪਾਬੰਦੀ ਉਸ ਵੇਲੇ ਤੱਕ ਕਾਇਮ ਰਹੇਗੀ ਜਦੋਂ ਤੱਕ Donald Trump ਦੀ ਸਰਕਾਰ ਸਟੀਲ, ਆਟੋਮੋਬੀਲ ਅਤੇ ਲੱਕੜ ਉਦਯੋਗਾਂ ‘ਤੇ ਲਾਗੂ ਕੀਤੇ ਟੈਰਿਫ਼ਾਂ ‘ਚ ਕੋਈ ਰਾਹਤ ਨਹੀਂ ਦਿੰਦੀ।ਕਾਰਨੀ ਨੇ ਸਪੱਸ਼ਟ ਕੀਤਾ ਕਿ ਕੈਨੇਡਾ ਵੱਲੋਂ ਲਿਆ ਗਿਆ ਇਹ ਕਦਮ ਇੱਕ ਜਵਾਬੀ ਕਾਰਵਾਈ ਹੈ, ਕਿਉਂਕਿ ਅਮਰੀਕੀ ਟੈਰਿਫ਼ਾਂ ਨੇ ਦੇਸ਼ ਦੇ ਮੁੱਖ ਉਦਯੋਗਾਂ ਨੂੰ ਗੰਭੀਰ ਆਰਥਿਕ ਝਟਕਾ ਦਿੱਤਾ ਹੈ। ਉਨ੍ਹਾਂ ਕਿਹਾ ਕਿ ਜੇ ਵਾਸ਼ਿੰਗਟਨ ਪੱਖੋਂ ਲਚਕਤਾ ਦਿਖਾਈ ਜਾਂਦੀ ਹੈ ਤਾਂ ਮਸਲੇ ਦਾ ਹੱਲ ਵੀ ਤੇਜ਼ੀ ਨਾਲ ਨਿਕਲ ਸਕਦਾ ਹੈ।ਉਨ੍ਹਾਂ ਇਹ ਵੀ ਦਰਸਾਇਆ ਕਿ ਸ਼ਰਾਬ ‘ਤੇ ਪਾਬੰਦੀ ਲਗਾਉਣ ਦਾ ਫੈਸਲਾ ਫੈਡਰਲ ਸਰਕਾਰ ਨਹੀਂ, ਸਗੋਂ ਸੂਬਾਈ ਸਰਕਾਰਾਂ ਨੇ ਲਿਆ ਹੈ। ਇਸ ਲਈ ਪਾਬੰਦੀ ਹਟਾਉਣ ਦਾ ਅਖੀਰਲਾ ਫੈਸਲਾ ਵੀ ਉਨ੍ਹਾਂ ਦੇ ਹੱਥ ਵਿੱਚ ਹੀ ਰਹੇਗਾ।
ਇਸ ਦੌਰਾਨ ਅਮਰੀਕੀ ਟ੍ਰੇਡ ਰੈਪ੍ਰਿਜ਼ੈਂਟੇਟਿਵ Jamieson Greer ਨੇ ਸੰਕੇਤ ਦਿੱਤਾ ਹੈ ਕਿ ਜੇ ਕੈਨੇਡਾ ਆਪਣੀ ਪਾਲਿਸੀ ‘ਚ ਬਦਲਾਅ ਨਹੀਂ ਕਰਦਾ ਤਾਂ ਅਮਰੀਕਾ ਵੱਲੋਂ ਵੀ ਵਾਪਸੀ ਕਾਰਵਾਈ ਕੀਤੀ ਜਾ ਸਕਦੀ ਹੈ।ਕਾਰਨੀ ਨੇ ਇਸ ਬਿਆਨ ‘ਤੇ ਜਵਾਬ ਦਿੰਦਿਆਂ ਕਿਹਾ ਕਿ ਅਸਲ ਮੁੱਦਾ ਸ਼ਰਾਬ ਨਹੀਂ, ਸਗੋਂ ਅਮਰੀਕਾ ਦੇ ਉਹ ਉੱਚੇ ਟੈਰਿਫ਼ ਹਨ ਜੋ ਸਟੀਲ ਤੇ ਐਲੂਮੀਨਮ ‘ਤੇ ਲਗਭਗ 50 ਫੀਸਦੀ ਅਤੇ ਆਟੋਮੋਬੀਲ ‘ਤੇ 25 ਫੀਸਦੀ ਤੱਕ ਪਹੁੰਚਦੇ ਹਨ। ਉਨ੍ਹਾਂ ਦੇ ਮੁਤਾਬਕ ਇਹ ਕਦਮ ਅੰਤਰਰਾਸ਼ਟਰੀ ਵਪਾਰਕ ਨਿਯਮਾਂ ਦੇ ਖ਼ਿਲਾਫ਼ ਹਨ।ਜ਼ਿਕਰਯੋਗ ਹੈ ਕਿ ਕੁਝ ਸੂਬਿਆਂ ਨੇ ਹਾਲਾਤਾਂ ਨੂੰ ਦੇਖਦਿਆਂ ਅਮਰੀਕੀ ਉਤਪਾਦਾਂ ਦੀ ਸੀਮਿਤ ਵਾਪਸੀ ਸ਼ੁਰੂ ਕਰ ਦਿੱਤੀ ਹੈ, ਪਰ LCBO ਵਰਗੀਆਂ ਏਜੰਸੀਆਂ ਹਾਲੇ ਵੀ ਆਪਣੇ ਸਟੋਰਾਂ ‘ਚ ਇਹਨਾਂ ਨੂੰ ਸ਼ਾਮਲ ਕਰਨ ਤੋਂ ਕੱਤਰ ਰਹੀਆਂ ਹਨ।ਇਸ ਪਾਬੰਦੀ ਕਾਰਨ ਅਮਰੀਕੀ ਸ਼ਰਾਬ ਉਦਯੋਗ ਨੂੰ ਵੀ ਵੱਡਾ ਨੁਕਸਾਨ ਹੋ ਰਿਹਾ ਹੈ ਅਤੇ ਦੋਵੇਂ ਦੇਸ਼ਾਂ ਵਿਚਕਾਰ ਵਪਾਰਕ ਤਣਾਅ ਹੋਰ ਗੰਭੀਰ ਹੋਣ ਦੀ ਸੰਭਾਵਨਾ ਜਤਾਈ ਜਾ ਰਹੀ ਹੈ।
