ਕੈਲੋਨਾ ਵਾਸੀ ਨੂੰ ਨਸ਼ਾ ਤਸਕਰੀ ਮਾਮਲੇ ’ਚ ਡਿਪੋਰਟੇਸ਼ਨ ਦਾ ਸਾਹਮਣਾ

ਕੈਲੋਨਾ-ਕੈਲੋਨਾ ਵਿੱਚ ਰਹਿ ਰਹੇ 46 ਸਾਲਾ ਯੂਕਰੇਨੀ ਨਾਗਰਿਕ ਦਮਿਤਰੋ ਨਿਕੋਲੇਵ ਨੂੰ ਕਥਿਤ ਅੰਤਰਰਾਸ਼ਟਰੀ ਨਸ਼ਾ ਤਸਕਰੀ ਮਾਮਲੇ ਵਿੱਚ ਕੈਨੇਡਾ ਤੋਂ ਯੂਕਰੇਨ ਭੇਜੇ ਜਾਣ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਉਸ ’ਤੇ ਬ੍ਰਿਟਿਸ਼ ਕੋਲੰਬੀਆ ਤੋਂ ਆਸਟ੍ਰੇਲੀਆ ਵੱਲ ਵੱਡੀ ਮਾਤਰਾ ਵਿੱਚ ਮੈਥਾਮਫੇਟਾਮਾਈਨ ਭੇਜਣ ਦੀ ਸਾਜ਼ਿਸ਼ ਵਿੱਚ ਸ਼ਾਮਲ ਹੋਣ ਦੇ ਦੋਸ਼ ਹਨ।ਆਰਸੀਐੱਮਪੀ ਅਤੇ ਆਸਟ੍ਰੇਲੀਆਈ ਫੈਡਰਲ ਪੁਲਿਸ ਨੇ ਜਨਵਰੀ 2025 ਤੋਂ ਜਨਵਰੀ 2026 ਤੱਕ ਇੱਕ ਅੰਤਰਰਾਸ਼ਟਰੀ ਨਸ਼ਾ ਤਸਕਰੀ ਨੈੱਟਵਰਕ ਦੀ ਜਾਂਚ ਕੀਤੀ। 27 ਜਨਵਰੀ ਨੂੰ ਟਸਵਾਸਨ ਕੰਟੇਨਰ ਜਾਂਚ ਕੇਂਦਰ ’ਤੇ ਇੱਕ ਖੇਪ ਵਿੱਚ ਅਚਾਰ ਦੇ ਜਾਰਾਂ ਵਾਲੀਆਂ ਪੈਲਟਾਂ ਵਿੱਚ ਲੁਕਾਈ ਲਗਭਗ 115 ਕਿਲੋਗ੍ਰਾਮ ਸ਼ੁੱਧ ਮੈਥਾਮਫੇਟਾਮਾਈਨ ਬਰਾਮਦ ਕੀਤੀ ਗਈ।

17 ਮਾਰਚ ਨੂੰ ਆਸਟ੍ਰੇਲੀਆਈ ਪੁਲਿਸ ਨੇ ਇਸ ਨਸ਼ੇ ਦੀ ਖੇਪ ਨਾਲ ਸਬੰਧਤ ਕੁਝ ਵਿਅਕਤੀਆਂ ਨੂੰ ਗ੍ਰਿਫ਼ਤਾਰ ਕੀਤਾ। ਇਸ ਤੋਂ ਬਾਅਦ ਕੈਨੇਡੀਅਨ ਪੁਲਿਸ ਨੇ ਐਬਟਸਫੋਰਡ ਅਤੇ ਲੋਅਰ ਨਿਕੋਲਾ ਦੀਆਂ ਗੋਦਾਮਾਂ ਅਤੇ ਕੈਲੋਨਾ ਦੀ ਇੱਕ ਜਾਇਦਾਦ ’ਤੇ ਛਾਪੇ ਮਾਰੇ, ਜਿੱਥੋਂ ਨਿਕੋਲੇਵ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ।ਸੂਬਾਈ ਅਧਿਕਾਰੀਆਂ ਦਾ ਦੋਸ਼ ਹੈ ਕਿ ਲੋਅਰ ਨਿਕੋਲਾ ਦੇ ਗੋਦਾਮ ਵਿੱਚ ਪੈਕਿੰਗ ਸਮੱਗਰੀ, ਕੈਨਿੰਗ ਦਾ ਸਾਮਾਨ, ਵੈਕਿਊਮ-ਸੀਲ ਬੈਗ ਅਤੇ ਨਿਕੋਲੇਵ ਦੇ ਨਾਮ ਵਾਲੇ ਸ਼ਿਪਿੰਗ ਲੇਬਲ ਮਿਲੇ। ਕੈਲੋਨਾ ਦੀ ਜਾਇਦਾਦ ਤੋਂ 8,700 ਕੈਨੇਡੀਅਨ ਡਾਲਰ ਅਤੇ 9,730 ਅਮਰੀਕੀ ਡਾਲਰ ਵੀ ਬਰਾਮਦ ਹੋਏ।ਨਿਕੋਲੇਵ ਨੇ 14 ਸਤੰਬਰ ਨੂੰ ਹੋਣ ਵਾਲੀ ਆਪਣੀ ਡਿਪੋਰਟੇਸ਼ਨ ਰੋਕਣ ਲਈ ਫੈਡਰਲ ਕੋਰਟ ਵਿੱਚ ਐਮਰਜੈਂਸੀ ਅਰਜ਼ੀ ਦਾਇਰ ਕੀਤੀ ਸੀ। 3 ਸਤੰਬਰ ਨੂੰ ਚੀਫ਼ ਜਸਟਿਸ ਐਲਨ ਡੀਨਰ ਨੇ ਉਸ ਦੀ ਅਰਜ਼ੀ ਰੱਦ ਕਰਦਿਆਂ ਕਿਹਾ ਕਿ ਉਹ ਡਿਪੋਰਟੇਸ਼ਨ ਰੋਕਣ ਲਈ ਲੋੜੀਂਦੇ ਕਾਨੂੰਨੀ ਮਾਪਦੰਡ ਪੂਰੇ ਨਹੀਂ ਕਰ ਸਕਿਆ।

ਇਸ ਮਾਮਲੇ ਵਿੱਚ ਬੀ.ਸੀ. ਸਰਕਾਰ ਨੇ ਨਿਕੋਲੇਵ ਖ਼ਿਲਾਫ਼ ਵੱਖਰੀ ਸਿਵਲ ਫੋਰਫੀਚਰ ਕਾਰਵਾਈ ਵੀ ਸ਼ੁਰੂ ਕੀਤੀ ਹੈ। ਹਾਲਾਂਕਿ, ਸਿਵਲ ਦਾਅਵੇ ਵਿੱਚ ਲਗਾਏ ਗਏ ਦੋਸ਼ ਅਜੇ ਅਦਾਲਤ ਵਿੱਚ ਸਾਬਤ ਨਹੀਂ ਹੋਏ ਹਨ।