ਪੰਜਾਬ ਦਾ ਜੰਗਲਾਤ ਖੇਤਰ ਸਿਰਫ਼ 3.67 ਫ਼ੀਸਦੀ, 63% ਜੰਗਲ ਤਿੰਨ ਸ਼ਿਵਾਲਿਕ ਜ਼ਿਲ੍ਹਿਆਂ ਵਿੱਚ ਕੇਂਦਰਿਤ

ਚੰਡੀਗੜ੍ਹ-ਪੰਜਾਬ ਵਿੱਚ 2022-23 ਦੌਰਾਨ ਕੈਂਪਾ (CAMPA) ਯੋਜਨਾ ਤਹਿਤ 5,827 ਹੈਕਟੇਅਰ ਰਕਬੇ ਵਿੱਚ 45.91 ਲੱਖ ਤੋਂ ਵੱਧ ਪੌਦੇ ਲਗਾਏ ਗਏ, ਪਰ ਇਸ ਦੇ ਬਾਵਜੂਦ ਸੂਬੇ ਦਾ ਜੰਗਲਾਤ ਖੇਤਰ ਦੇਸ਼ ਦੇ ਸਭ ਤੋਂ ਘੱਟ ਜੰਗਲ ਵਾਲੇ ਰਾਜਾਂ ਵਿੱਚ ਸ਼ਾਮਲ ਹੈ।

ਵਿਧਾਨ ਸਭਾ ਵਿੱਚ ਪੇਸ਼ ਕੀਤੀ ਗਈ ਪੰਜਾਬ ਕੈਂਪਾ ਸਾਲਾਨਾ ਰਿਪੋਰਟ 2022-23 ਮੁਤਾਬਕ, ਪੰਜਾਬ ਦੇ ਕੁੱਲ 50,362 ਵਰਗ ਕਿਲੋਮੀਟਰ ਭੂਗੋਲਿਕ ਖੇਤਰ ਵਿੱਚੋਂ ਸਿਰਫ਼ 1,846.09 ਵਰਗ ਕਿਲੋਮੀਟਰ 'ਤੇ ਹੀ ਜੰਗਲ ਹਨ। ਇਹ ਸੂਬੇ ਦੇ ਕੁੱਲ ਰਕਬੇ ਦਾ ਕੇਵਲ 3.67 ਫ਼ੀਸਦੀ ਬਣਦਾ ਹੈ।

ਰਿਪੋਰਟ ਅਨੁਸਾਰ ਹੁਸ਼ਿਆਰਪੁਰ ਜ਼ਿਲ੍ਹੇ ਵਿੱਚ ਸਭ ਤੋਂ ਵੱਧ 697.31 ਵਰਗ ਕਿਲੋਮੀਟਰ ਜੰਗਲ ਹਨ, ਜੋ ਪੰਜਾਬ ਦੇ ਕੁੱਲ ਜੰਗਲਾਤ ਖੇਤਰ ਦਾ ਕਰੀਬ 38 ਫ਼ੀਸਦੀ ਹੈ। ਇਸ ਤੋਂ ਬਾਅਦ ਰੂਪਨਗਰ ਵਿੱਚ 275.90 ਅਤੇ ਪਠਾਨਕੋਟ ਵਿੱਚ 192.46 ਵਰਗ ਕਿਲੋਮੀਟਰ ਜੰਗਲ ਦਰਜ ਕੀਤੇ ਗਏ ਹਨ।

ਇਹ ਤਿੰਨੇ ਸ਼ਿਵਾਲਿਕ ਜ਼ਿਲ੍ਹੇ ਮਿਲ ਕੇ 1,165.67 ਵਰਗ ਕਿਲੋਮੀਟਰ ਜੰਗਲਾਂ ਦੇ ਮਾਲਕ ਹਨ, ਜੋ ਪੰਜਾਬ ਦੇ ਕੁੱਲ ਜੰਗਲਾਤ ਖੇਤਰ ਦਾ ਲਗਭਗ 63 ਫ਼ੀਸਦੀ ਬਣਦਾ ਹੈ।ਰਿਪੋਰਟ ਵਿੱਚ ਇਹ ਵੀ ਦਰਸਾਇਆ ਗਿਆ ਹੈ ਕਿ ਵੱਡੇ ਪੱਧਰ 'ਤੇ ਪੌਦੇ ਲਗਾਉਣ ਦੇ ਬਾਵਜੂਦ ਸੂਬੇ ਦੇ ਜੰਗਲਾਤ ਖੇਤਰ ਵਿੱਚ ਲੋੜ ਅਨੁਸਾਰ ਵਾਧਾ ਨਹੀਂ ਹੋਇਆ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਵਾਤਾਵਰਣ ਸੰਤੁਲਨ ਅਤੇ ਜੈਵ ਵਿਭਿੰਨਤਾ ਦੀ ਰੱਖਿਆ ਲਈ ਪੰਜਾਬ ਨੂੰ ਜੰਗਲਾਂ ਦਾ ਰਕਬਾ ਵਧਾਉਣ ਵਾਸਤੇ ਹੋਰ ਪ੍ਰਭਾਵਸ਼ਾਲੀ ਕਦਮ ਚੁੱਕਣ ਦੀ ਲੋੜ ਹੈ।