ਬੀ.ਸੀ. ਦੇ 911 ਕਰਮਚਾਰੀਆਂ ਵੱਲੋਂ 72 ਘੰਟਿਆਂ ਦੀ ਹੜਤਾਲ ਨੋਟਿਸ ਜਾਰੀ
ਵੈਨਕੂਵਰ-ਬ੍ਰਿਟਿਸ਼ ਕੋਲੰਬੀਆ ਵਿੱਚ ਐਮਰਜੈਂਸੀ ਕਮਿਊਨੀਕੇਸ਼ਨ ਸੇਵਾਵਾਂ ਨਾਲ ਜੁੜੇ 700 ਤੋਂ ਵੱਧ ਕਰਮਚਾਰੀਆਂ ਦੀ ਯੂਨੀਅਨ CUPE 8911 ਵੱਲੋਂ 72 ਘੰਟਿਆਂ ਦੀ ਹੜਤਾਲ ਨੋਟਿਸ ਜਾਰੀ ਕਰ ਦਿੱਤੀ ਗਈ ਹੈ। ਲੰਬੇ ਸਮੇਂ ਤੋਂ ਚੱਲ ਰਹੀਆਂ ਗੱਲਬਾਤਾਂ ਬੇਨਤੀਜਾ ਰਹਿਣ ਮਗਰੋਂ ਯੂਨੀਅਨ ਨੇ ਇਹ ਕਦਮ ਚੁੱਕਿਆ ਹੈ।ਯੂਨੀਅਨ ਦੇ ਪ੍ਰਧਾਨ ਡੋਨਾਲਡ ਗਰਾਂਟ ਨੇ ਕਿਹਾ ਕਿ ਬ੍ਰਿਟਿਸ਼ ਕੋਲੰਬੀਆ ਦੇ ਲੋਕ ਉਮੀਦ ਕਰਦੇ ਹਨ ਕਿ 911 ’ਤੇ ਕਾਲ ਕਰਨ ਸਮੇਂ ਉਨ੍ਹਾਂ ਨੂੰ ਤੁਰੰਤ ਮਦਦ ਮਿਲੇਗੀ, ਪਰ ਮੌਜੂਦਾ ਹਾਲਾਤਾਂ ਵਿੱਚ ਐਮਰਜੈਂਸੀ ਕਾਲਾਂ ਸੰਭਾਲਣ ਵਾਲੇ ਕਰਮਚਾਰੀ ਬੇਹੱਦ ਦਬਾਅ ਹੇਠ ਕੰਮ ਕਰ ਰਹੇ ਹਨ।
ਯੂਨੀਅਨ ਨੇ ਸੂਬੇ ਦੇ ਮਜ਼ਦੂਰ ਮੰਤਰੀ ਤੋਂ ਮੰਗ ਕੀਤੀ ਹੈ ਕਿ ਮਾਮਲੇ ਦੇ ਹੱਲ ਲਈ ਇੱਕ ਵਿਸ਼ੇਸ਼ ਮੱਧਸਥ ਨਿਯੁਕਤ ਕੀਤਾ ਜਾਵੇ ਤਾਂ ਜੋ ਨਵੇਂ ਸਮਝੌਤੇ ਤੱਕ ਪਹੁੰਚ ਬਣ ਸਕੇ ਅਤੇ 911 ਸੇਵਾ ਨੂੰ ਸਥਿਰ ਤੇ ਭਰੋਸੇਯੋਗ ਰੱਖਿਆ ਜਾ ਸਕੇ।ਜਾਣਕਾਰੀ ਅਨੁਸਾਰ ਨਵੰਬਰ ਤੋਂ ਚੱਲ ਰਹੀਆਂ ਗੱਲਬਾਤਾਂ ਦੌਰਾਨ E-Comm 9-1-1 ਅਤੇ CUPE 8911 ਵਿਚਕਾਰ 20 ਤੋਂ ਵੱਧ ਮੀਟਿੰਗਾਂ ਹੋ ਚੁੱਕੀਆਂ ਹਨ, ਪਰ ਦੋਵੇਂ ਧਿਰਾਂ ਕਿਸੇ ਸਹਿਮਤੀ ’ਤੇ ਨਹੀਂ ਪਹੁੰਚ ਸਕੀਆਂ।ਵਿਵਾਦ ਦੇ ਮੁੱਖ ਮੁੱਦਿਆਂ ਵਿੱਚ ਉਚਿਤ ਤਨਖ਼ਾਹਾਂ, ਸੁਰੱਖਿਅਤ ਸਟਾਫ਼ਿੰਗ ਪੱਧਰ ਅਤੇ ਕਰਮਚਾਰੀਆਂ ਲਈ ਬਿਹਤਰ ਸਿਹਤ ਤੇ ਵੈੱਲਨੈੱਸ ਸਹੂਲਤਾਂ ਸ਼ਾਮਲ ਹਨ।ਪਿਛਲੇ ਮਹੀਨੇ ਯੂਨੀਅਨ ਮੈਂਬਰਾਂ ਨੇ 95 ਫੀਸਦੀ ਸਮਰਥਨ ਨਾਲ ਹੜਤਾਲ ਦੇ ਹੱਕ ਵਿੱਚ ਵੋਟਿੰਗ ਕੀਤੀ ਸੀ। ਇਸ ਹਫ਼ਤੇ ਮੁੜ ਸ਼ੁਰੂ ਹੋਈਆਂ ਗੱਲਬਾਤਾਂ ਵੀ ਬਿਨਾਂ ਕਿਸੇ ਨਤੀਜੇ ਦੇ ਖਤਮ ਹੋਈਆਂ ਅਤੇ ਹੁਣ ਦੋਵੇਂ ਧਿਰਾਂ ਅਧਿਕਾਰਿਕ ਤੌਰ ’ਤੇ ਅੜਿੱਕੇ ’ਚ ਪਹੁੰਚ ਗਈਆਂ ਹਨ।
ਯੂਨੀਅਨ ਦਾ ਕਹਿਣਾ ਹੈ ਕਿ ਹੜਤਾਲ ਹਮੇਸ਼ਾਂ ਆਖ਼ਰੀ ਵਿਕਲਪ ਹੁੰਦੀ ਹੈ, ਪਰ ਜੰਗਲਾਂ ਦੀਆਂ ਅੱਗਾਂ ਦੇ ਮੌਸਮ, ਖ਼ਰਾਬ ਮੌਸਮੀ ਹਾਲਾਤਾਂ ਅਤੇ ਗਰਮੀਆਂ ਦੌਰਾਨ ਵਧ ਰਹੀ ਐਮਰਜੈਂਸੀ ਮੰਗ ਨੂੰ ਦੇਖਦਿਆਂ 911 ਸਿਸਟਮ ਵਿੱਚ ਸਟਾਫ਼ ਦੀ ਘਾਟ ਦਾ ਹੱਲ ਤੁਰੰਤ ਲੱਭਣਾ ਜ਼ਰੂਰੀ ਹੈ।CUPE 8911 ਦੇ ਕਰਮਚਾਰੀ 8 ਜੂਨ ਦੁਪਹਿਰ 3:29 ਵਜੇ ਤੋਂ ਕਾਨੂੰਨੀ ਤੌਰ ’ਤੇ ਹੜਤਾਲ ਕਰਨ ਦੀ ਸਥਿਤੀ ਵਿੱਚ ਹੋਣਗੇ। ਹਾਲਾਂਕਿ ਜ਼ਰੂਰੀ ਸੇਵਾਵਾਂ ਦੇ ਹੁਕਮ ਤਹਿਤ ਕੁਝ ਐਮਰਜੈਂਸੀ ਸੇਵਾਵਾਂ ਜਾਰੀ ਰੱਖਣੀਆਂ ਲਾਜ਼ਮੀ ਹੋਣਗੀਆਂ।ਯੂਨੀਅਨ ਨੇ ਕਿਹਾ ਕਿ ਉਹ ਅਜੇ ਵੀ ਗੱਲਬਾਤ ਲਈ ਤਿਆਰ ਹੈ ਅਤੇ ਉਮੀਦ ਕਰਦੀ ਹੈ ਕਿ ਦੋਵੇਂ ਧਿਰਾਂ ਮਿਲ ਕੇ ਕੋਈ ਵਾਜਬ ਹੱਲ ਕੱਢ ਲੈਣਗੀਆਂ ਤਾਂ ਜੋ ਸੇਵਾਵਾਂ ਵਿੱਚ ਰੁਕਾਵਟ ਤੋਂ ਬਚਿਆ ਜਾ ਸਕੇ।
