ਐਲਬਰਟਾ ਵਿੱਚ ਕੈਨੇਡਾ ਦਾ ਪਹਿਲਾ ਕਾਰਬਨ ਸਟੋਰੇਜ ਹੱਬ ਸ਼ੁਰੂ, ਕਰੋੜਾਂ ਡਾਲਰ ਦੇ ਨਿਵੇਸ਼ ਦੀ ਉਮੀਦ
ਐਡਮੰਟਨ-ਐਲਬਰਟਾ ਵਿੱਚ ਕਾਰਬਨ ਕੈਪਚਰ, ਯੂਟਿਲਾਈਜ਼ੇਸ਼ਨ ਅਤੇ ਸਟੋਰੇਜ (CCUS) ਖੇਤਰ ਵਿੱਚ ਵੱਡੀ ਉਪਲਬਧੀ ਦਰਜ ਕਰਦਿਆਂ ਕੈਨੇਡਾ ਦਾ ਪਹਿਲਾ “ਮੀਡੋਬਰੂਕ ਕਾਰਬਨ ਸਟੋਰੇਜ ਹੱਬ” ਅਧਿਕਾਰਿਕ ਤੌਰ ‘ਤੇ ਸ਼ੁਰੂ ਕਰ ਦਿੱਤਾ ਗਿਆ ਹੈ। ਇਹ ਪ੍ਰੋਜੈਕਟ ਐਲਬਰਟਾ ਵਿੱਚ ਨਿਵੇਸ਼ ਅਤੇ ਉਦਯੋਗਿਕ ਵਿਕਾਸ ਲਈ ਵੱਡਾ ਕਦਮ ਮੰਨਿਆ ਜਾ ਰਿਹਾ ਹੈ।ਸਟੁਰਜਨ ਕਾਊਂਟੀ ਦੇ ਲੀਗਲ ਇਲਾਕੇ ਨੇੜੇ ਸਥਿਤ ਇਸ ਪ੍ਰੋਜੈਕਟ ਦੇ ਪਹਿਲੇ ਪੜਾਅ ਤਹਿਤ ਹਰ ਸਾਲ 5 ਲੱਖ ਕਿਲੋਟਨ ਤੱਕ ਕਾਰਬਨ ਡਾਈਆਕਸਾਈਡ ਸਟੋਰ ਕਰਨ ਦੀ ਮਨਜ਼ੂਰੀ ਦਿੱਤੀ ਗਈ ਹੈ। ਭਵਿੱਖ ਵਿੱਚ ਇਸ ਦੀ ਸਮਰੱਥਾ ਵਧਾ ਕੇ ਘੱਟੋ-ਘੱਟ 30 ਲੱਖ ਟਨ ਸਾਲਾਨਾ ਕਰਨ ਦੀ ਯੋਜਨਾ ਹੈ।
“ਬਾਇਸਨ ਲੋ ਕਾਰਬਨ ਵੈਂਚਰਜ਼” ਵੱਲੋਂ ਤਿਆਰ ਕੀਤੇ ਗਏ ਇਸ ਸਟੋਰੇਜ ਹੱਬ ਵਿੱਚ ਸ਼ੁਰੂਆਤੀ ਤੌਰ ‘ਤੇ ਲਗਭਗ 1 ਕਰੋੜ 70 ਲੱਖ ਡਾਲਰ ਦਾ ਨਿੱਜੀ ਨਿਵੇਸ਼ ਕੀਤਾ ਗਿਆ ਹੈ, ਜਦਕਿ ਆਉਣ ਵਾਲੇ ਪੜਾਵਾਂ ਵਿੱਚ ਇਹ ਨਿਵੇਸ਼ ਕਰੀਬ 15 ਕਰੋੜ ਡਾਲਰ ਤੱਕ ਪਹੁੰਚਣ ਦੀ ਸੰਭਾਵਨਾ ਹੈ।ਜਾਬਜ਼, ਅਰਥਵਿਵਸਥਾ, ਵਪਾਰ ਅਤੇ ਇਮੀਗ੍ਰੇਸ਼ਨ ਮੰਤਰੀ ਜੋਸਫ਼ ਸਕੋ ਨੇ ਕਿਹਾ ਕਿ ਇਸ ਤਰ੍ਹਾਂ ਦੇ ਨਿਵੇਸ਼ ਇਹ ਦਰਸਾਉਂਦੇ ਹਨ ਕਿ ਐਲਬਰਟਾ ਕਾਰੋਬਾਰ, ਨਿਵੇਸ਼ ਅਤੇ ਉਦਯੋਗਿਕ ਵਿਕਾਸ ਲਈ ਸਭ ਤੋਂ ਵਧੀਆ ਸਥਾਨ ਬਣਿਆ ਹੋਇਆ ਹੈ। ਉਨ੍ਹਾਂ ਕਿਹਾ ਕਿ ਸਰਕਾਰ ਨਵੀਂ ਤਕਨਾਲੋਜੀ ਅਤੇ ਰੋਜ਼ਗਾਰ ਦੇ ਮੌਕੇ ਪੈਦਾ ਕਰਨ ਵਾਲੀਆਂ ਕੰਪਨੀਆਂ ਨੂੰ ਪੂਰਾ ਸਹਿਯੋਗ ਦੇ ਰਹੀ ਹੈ।
ਊਰਜਾ ਅਤੇ ਖਣਿਜ ਮੰਤਰੀ ਬ੍ਰਾਇਨ ਜੀਨ ਨੇ ਕਿਹਾ ਕਿ ਐਲਬਰਟਾ ਕਾਰਬਨ ਕੈਪਚਰ ਅਤੇ ਸਟੋਰੇਜ ਤਕਨਾਲੋਜੀ ਵਿੱਚ ਵਿਸ਼ਵ ਪੱਧਰ ‘ਤੇ ਅਗਵਾਈ ਕਰ ਰਿਹਾ ਹੈ ਅਤੇ ਮੀਡੋਬਰੂਕ ਵਰਗੇ ਪ੍ਰੋਜੈਕਟ ਸੂਬੇ ਨੂੰ ਜ਼ਿੰਮੇਵਾਰ ਊਰਜਾ ਉਤਪਾਦਨ ਵਿੱਚ ਹੋਰ ਮਜ਼ਬੂਤ ਬਣਾਉਂਦੇ ਹਨ।ਬਾਇਸਨ ਲੋ ਕਾਰਬਨ ਵੈਂਚਰਜ਼ ਦੇ ਪ੍ਰਧਾਨ ਮੈਥਿਊ ਬ੍ਰਿਸਟਰ ਨੇ ਕਿਹਾ ਕਿ ਇਹ ਹੱਬ ਵੱਡੇ ਉਦਯੋਗਿਕ ਗਾਹਕਾਂ ਲਈ ਪਾਈਪਲਾਈਨ ਰਾਹੀਂ ਅਤੇ ਛੋਟੇ ਪ੍ਰੋਜੈਕਟਾਂ ਲਈ ਟਰੱਕਾਂ ਰਾਹੀਂ ਸੁਰੱਖਿਅਤ ਅਤੇ ਘੱਟ ਲਾਗਤ ਵਾਲੀ ਕਾਰਬਨ ਸਟੋਰੇਜ ਸਹੂਲਤ ਪ੍ਰਦਾਨ ਕਰੇਗਾ। ਉਨ੍ਹਾਂ ਕਿਹਾ ਕਿ ਫੈਡਰਲ ਅਤੇ ਪ੍ਰੋਵਿੰਸ਼ੀਅਲ ਸਰਕਾਰਾਂ ਵਿਚਕਾਰ ਹੋਏ ਤਾਜ਼ਾ ਸਮਝੌਤੇ ਨਾਲ ਉਦਯੋਗਿਕ ਕਾਰਬਨ ਕੈਪਚਰ ਪ੍ਰੋਜੈਕਟਾਂ ਨੂੰ ਹੋਰ ਮਦਦ ਮਿਲਣ ਦੀ ਉਮੀਦ ਹੈ।ਇਸ ਪ੍ਰੋਜੈਕਟ ਲਈ “ਇਨਵੈਸਟ ਐਲਬਰਟਾ ਕਾਰਪੋਰੇਸ਼ਨ” ਨੇ ਵੀ ਅਹਿਮ ਭੂਮਿਕਾ ਨਿਭਾਈ। ਸੰਸਥਾ ਨੇ ਟੋਕੀਓ ਵਿੱਚ ਮਾਰੂਬੇਨੀ ਕਾਰਪੋਰੇਸ਼ਨ ਸਮੇਤ ਨਿਵੇਸ਼ਕਾਂ ਨਾਲ ਸਿੱਧਾ ਸੰਪਰਕ ਬਣਾਕੇ ਪ੍ਰੋਜੈਕਟ ਨੂੰ ਅੱਗੇ ਵਧਾਉਣ ਵਿੱਚ ਮਦਦ ਕੀਤੀ।
ਇਨਵੈਸਟ ਐਲਬਰਟਾ ਦੇ ਕਾਰਜਕਾਰੀ ਸੀਈਓ ਕੀਥ ਬ੍ਰੈਡਲੀ ਨੇ ਕਿਹਾ ਕਿ ਮੀਡੋਬਰੂਕ ਪ੍ਰੋਜੈਕਟ ਇਸ ਗੱਲ ਦਾ ਸਬੂਤ ਹੈ ਕਿ ਐਲਬਰਟਾ ਵਿੱਚ ਕਾਰਬਨ ਕੈਪਚਰ ਸਬੰਧੀ ਯੋਜਨਾਵਾਂ ਨੂੰ ਹਕੀਕਤ ਵਿੱਚ ਬਦਲਣ ਦੀ ਸਮਰੱਥਾ ਹੈ। ਉਨ੍ਹਾਂ ਕਿਹਾ ਕਿ ਸੂਬੇ ਦਾ ਵਪਾਰ-ਅਨੁਕੂਲ ਮਾਹੌਲ, ਤਕਨੀਕੀ ਮਾਹਿਰਤਾ ਅਤੇ ਸਪਸ਼ਟ ਨੀਤੀਆਂ ਨਿਵੇਸ਼ਕਾਂ ਨੂੰ ਆਕਰਸ਼ਿਤ ਕਰ ਰਹੀਆਂ ਹਨ।ਸਰਕਾਰ ਮੁਤਾਬਕ ਐਲਬਰਟਾ ਵਿੱਚ ਘੱਟ ਕਾਰਪੋਰੇਟ ਟੈਕਸ, ਮਾਹਰ ਵਰਕਫੋਰਸ, ਘੱਟ ਕਾਗਜ਼ੀ ਕਾਰਵਾਈ ਅਤੇ ਨਿਵੇਸ਼-ਪੱਖੀ ਨੀਤੀਆਂ ਕਾਰਨ ਦੁਨੀਆ ਭਰ ਦੀਆਂ ਕੰਪਨੀਆਂ ਵੱਡੇ ਪ੍ਰੋਜੈਕਟਾਂ ਲਈ ਸੂਬੇ ਨੂੰ ਤਰਜੀਹ ਦੇ ਰਹੀਆਂ ਹਨ।
